Arabako Bertsolari Txapelketa

Arabako Bertsozale Elkartea 1993an sortu bazen ere Arabako Bertsolaritzaren historia garaikidea 1984an hasi zen, Gasteizko eta Aiarako Bertso Eskolak sortu eta berehala. 1984. urtean Arabako Lehendabiziko bertsolari Txapelketa antolatu zen. Orduan hasi eta 2002ra bitartean Arabako Bertsolari Txapelketa izenik izan ez bazuen ere, Prudentzio Deuna Estibalizko Ama bertso sariketa izan zen bertako bertsolarien indarrak neurtzeko plaza, 1990ean hasi eta 2001. urte arte.
Arabako Txapelketa ofizialik ezean, Araba-Bizkaiko txapelketa izan da 1987tik 2000. urte arte Arabarrek Txapelketa nagusirako txartelak eskuratzeko lekua. Baina 2000. urtean Arabak bere bide propioa egitea erabaki zuen eta bere ordezkaritza propioa izan zuen 2001eko Bertsolari Txapelketa Nagusian.
Bide horretatik aurrera eginda etorri zen 2002ko Arabako Bertsolari Txapelketa ere. Entzuleriaren eta bertsolarien mailak ez ezik, Printzipaleko finalaren argazkiak ere garai berri bat iragartzen zuen.
“Sustraiak errotuz” izan zen 2009ko Arabako Bertsolari Txapelketako leloa, eta horixe izan da Arabako Bertsozale Elkartea sortu zenetik, eskuartean izan dugun erronkarik garrantzitsuenetako bat. Esan bezala, bertsolaritza Gasteiz edo Aiara aldean bakarrik zen ezaguna, baina gaur egun, herrialde osoan lantzen da ikastetxez ikastetxe; hainbat herritan bertso-eskola berriak sortu dira eta bertsolaritzaren lanketa, sustapena eta transmisioa eskualde guztietara zabaldu da.
Sustraiak errotuta eta 2009ko Arabako Bertsolari Txapelketa arrakastatsuak ilusio eta indar berriekin jarri gintuen 2010 begira. Hazteko gogoz, Arabako Bertsolari Txapelketa bere laugarren garaian sartu zen 2010.urtean. Formatu aldaketa ekarri zuen eta indibiduala izatetik taldeka izatera pasatu zen. Arabako Kuadrilla arteko Bertso Txapelketak bertsolari, epaile, gai-jartzaile berriak sortzen lagundu zuen. Elkarlanean sortutako Txapelketa herrikoia izanda bertsozale berriak ere hurbildu ziren.
1984. urtean lehenengo aldiz txapelketa bat antolatu zenetik aldaketa dezente jasan ditu gure egunetaraino, izena eta izana aldatu dituela esan daiteke. Baina emandako aldaketa eta aurrerapauso guztiei esker, lortu dugu gaur egun gauden lekuan egotea. Orain banakako Arabako Bertsolari Txapelketa 2 urtean behin egingo da eta tartean gelditzen den urtean Arabako Kuadrilla arteko Bertso Txapelketa antolatuko dugu.
2011ko Arabako Bertsolari Txapelketa ezberdina izango da eta honek ilusioz betetzen gaitu. 18 bertsolari izatetik 2009.urtean 30 izatera pasatu dugu 2010. Urtean. Zazpi epaile arituko dira txapelketan eta autonomia lortu dugu. Gai-jartzaile taldea ere handitu eta sendotu da.

 

Urtea	Lekua	Izena	Txapelduna
1984	Gasteiz: Florida antzokia	Arabako Txapelketa	Juan Isasi "Txinotxu"
1990	Gasteiz: Florida kultur etxea	I. Prudentzio Deuna sariketa	Abel Enbeita
1991	Gasteiz: Florida kultur etxea	II. Prudentzio Deuna sariketa	Pedro Bizkarguenaga
1992	Gasteiz: Florida kultur etxea	III. Prudentzio Deuna sariketa	Rikardo Gonzalez de Durana
1993	Gasteiz: Florida kultur etxea	IV. Prudentzio Deuna sariketa	Zigor Enbeita
1994	Gasteiz: Florida kultur etxea	V. Prudentzio Deuna sariketa	Zigor Enbeita
1995	Gasteiz: Florida kultur etxea	VI. Prudentzio Deuna sariketa	Rikardo Gonzalez de Durana
1996	Gasteiz: Florida kultur etxea	VII. Prudentzio Deuna sariketa	Asier Iriondo
1997	Gasteiz: Florida kultur etxea	VIII. Prudentzio Deuna sariketa	Asier Otamendi
1998	Gasteiz: Florida kultur etxea	IX. Prudentzio Deuna sariketa	Asier Otamendi
1999	Gasteiz: Florida kultur etxea	X. Prudentzio Deuna sariketa	Asier Otamendi
2000	Gasteiz: Florida kultur etxea	XI. Prudentzio Deuna sariketa	Asier Otamendi
2001	Gasteiz: Florida kultur etxea	XII. Prudentzio Deuna sariketa	Asier Otamendi
2002	Gasteiz: Printzipal antzokia	2002ko Arabako Txapelketa	Asier Otamendi
2003	Gasteiz: Printzipal antzokia	2003ko Arabako Txapelketa	Zigor Enbeita
2004	Gasteiz: Printzipal antzokia	2004ko Arabako Txapelketa	Asier Otamendi
2005	Gasteiz: Guridi antzokia	2005eko Arabako Txapelketa	Asier Otamendi
2006	Gasteiz: Guridi antzokia	2006ko Arabako Txapelketa	Zigor Enbeita
2007	Gasteiz: Guridi antzokia	2007ko Arabako Txapelketa	Oihane Perea
2008	Gasteiz: Printzipal Antzokia	2008ko Arabako Txapelketa	Asier Otamendi
2009	Gasteiz: Printzipal Antzokia	2009ko Arabako Txapelketa	Oihane Perea

 Arabako Bertsozale Elkartea. www.bertsozale.com web orritik hartuta.